Калина Малеска
Калина Малеска е писателка, професорка, книжевна преведувачка.
Авторка е на: романите Бруно и боите (2006), Призраци со срмени нишки (2014) и Светот што го избрав (2024), збирките раскази: Недоразбирања (1998), Именување на инсектот (2008), Мојот непријател Итар Пејо (2016) и Скопје во високата зона (2021), драмата Случка меѓу настани: Хипатија од Александрија (2010); книгите за деца: Арно ама (2018) и Вонземјанинот Лу-Ру-Су (2021).
За романот Светот што го избрав ја доби наградата Роман на годината за 2024 што ја доделува Фондацијата за унапредување и промоција на културните вредности „Славко Јаневски“.
Нејзини раскази се преведени на неколку јазици и објавени во списанија во земјата и во странство, а учествувала и на повеќе македонски и меѓународни книжевни фестивали. Нејзиниот расказ „Поинаков вид оружје“ е застапен во антологијата Best European Fiction 2018. Добитничка е и на неколку книжевни резиденции.
Работи како професорка по англиска книжевност на Филолошкиот факултет „Блаже Конески“ при УКИМ во Скопје. Докторира во 2012 година со докторат на тема за феноменот на моќта. Во фокус на нејзините книжевни истражувања се утописка книжевност, постколонијална книжевност, современата книжевност и нејзината поврзаност со општествено-политичките случувања.
Во однос на превод на книги од англиски на македонски, Малеска има преведено десетина книжевни дела од автори како Лорнс Стерн, Марк Твен, Џуничиро Танизаки, Амброуз Бирс, Л. Френк Баум, Катерина Бабкина, Клер Киган и Леа Ипи.
.
Светот што го избрав
„Или-или“, Скопје, 2024
НАГРАДА „РОМАН НА ГОДИНАТА“, 2024
Романот „Светот што го избрав“ е приказна за трансформацијата на Леона, чие чувство за себе и сопствениот идентитет се менува низ контактот со луѓето и просторите: подрумот во кој се вселува, состанарите и околниот двор, членовите на одборот за наставни програми, канцеларијата за состаноци, барот. На почетокот од романот протагонистката, по дваесет години живот со своето семејство, се соочува со нова ситуација, без стан, без работа, без пари, со привремен ангажман. Новите околности и луѓето што ги запознава кај неа поттикнуваат сеќавања, интроспекција, анализа на своите и на туѓите постапки, изнаоѓање на причините зад нив.