Јап Робен (Остерхaут, Холандија, 1984) е писател и поет, автор на романи, поезија, книги за деца и драмски текстови. Студирал менаџмент на животната средина, а подоцна се образувал и на Театарската академија „Конингс“.
Како автор дебитирал со поезија и книги за деца, а неговите дела за најмладите се одликуваат со хумор, фантазија и чувствителност кон сложените детски искуства. Во 2014 година го објавува својот прв роман за возрасни, „Бирк“, кој станува бестселер во Холандија и добива повеќе книжевни награди, меѓу кои и Книга на годината според холандските книжари.
„Летна кожа“ (2018) е преведен на повеќе јазици, бил кандидат за Меѓународната Букерова награда за 2021 година и е филмуван. Во 2022 година го објавува својот многу дискутиран роман „Светлината на самракот“, кој станал бестселер и ја добил наградата „Confituur Booksellers Award“ за 2023 година.
Во своите романи Робен често пишува за загубата, семејните односи, осаменоста, вината, грижата и невидливите траги што луѓето ги оставаат едни во други.
Неговото пишување се одликува со едноставен, прецизен и поетичен јазик, преку кој интимните приказни ги претвора во универзални теми. Робен живее и работи во Холандија, а покрај пишувањето одржува работилници по креативно пишување и учествува во различни книжевни и театарски проекти.
jaap_robben
Светлината на самракот
Превод: Елизабета Божиноска
„Антолог“, Скопје, 2025
Ова трогателно дело ѝ дава глас на тивката тага на мајките на мртвороденчињата.
Младата слободоумна цвеќарка Фрида пораснала во строго католичко опкружување во 1960-тите. Кога ќе зачекори на замрзната река едно зимско попладне, не може ни да замисли дека сè ќе се промени за неа. Љубовта со оженетиот Ото започнува бурно и завршува со нејзина бременост – скандал во светот во кој таа живее.
Фрида со децении ги чува спомените од оваа епизода од својот живот само за себе, но тагата за изгубеното чедо останува и покрај подоцнежниот брак и синот што го раѓа. На осумдесет и една година, ненадејно повторно е сама. Тивката тага се враќа со полна сила. Дури тогаш се осмелува да се соочи со својата приказна – и да ја сподели.
Со ова дело, инспирирано од вистински настани, Робен не само што го трга превезот од приказната на Фрида туку фрла светлина и врз искуствата на безброј жени. Резултатот е импресивна приказна за закопаната женска траума, предизвикана од општеството, организираната религија и од доминантните општествени обичаи.