АНТОН БАЕВ
Бугарија
Антон Баев (роден 1963) е бугарски писател. Студирал бугарска филологија во Пловдив, a специјализирал новинарство во Ајова, САД. Работел како библиотекар, колумнист, репортер, главен уредник и издавач. Има објавено голем број книги од различни жанрови. Учествувал на меѓународни фестивали и манифестации, меѓу кои и на книжевната резиденција „Апсолутно модерен“ во Скопје.
Светата крв
Превод: Борче Георгиев
Романот „Светата крв“ е роман за љубовта и страстите во сите свои димензии, за злосторството, одмаздата, проштавањето, а како ликови се јавуваат учители и ученици во еден историски бурен период од 1920 до 1950 година. Клучното место на случувањата е забутаното гратче Ја. Романот е составен од четири дела, а секој дел започнува со извадок од „Четирите годишни времиња“ на Антонио Вивалди. Романот е напишан така што речениците звучат како музика, многу блиску до поезија.
Колку историска толку и универзална, книгата проникнува во самата суштина на човечкото, во неговата природа. Од собитијата извираат страдањата, мислите, зборовите што ги изговараат, музиката што ја слушаат, книгите што ги читаат, филмовите што ги гледаат…
Самиот автор би рекол: „Кога Флобер бил запрашан која е Мадам Бовари, одговорил ’Тоа сум јас!‘, истото го мислам и јас за ’Светата крв‘.“