Македонија
Владимир Јанковски (1977) е писател и преведувач. Дипломирал на Катедрата за општа и компаративна книжевност на Филолошкиот факултет „Блаже Конески“ во Скопје. Работел како уредник во неколку издавачки куќи. Има објавено седум книги. За романот „Скриени желби, немирни патувања“ ја добил наградата „Роман на годината“ и бил македонски кандидат за Наградата за литература на Европската Унија, а за „Невидливи љубови“ ја добил наградата „Рациново признание“. Активно се занимава со книжевен превод. На македонски јазик превел книги од Дубравка Угрешиќ, Миљенко Јерговиќ, Маргарет Етвуд, Филип К. Дик, Милош Црњански, Јанис Јоневс, Слободан Шнајдер, Дамир Каракаш, Мухарем Баздуљ, Горан Трибусон, Роберт Перишиќ, Светлана Слапшак, Чарлс Буковски и други.
СКРИЕНИ ЖЕЛБИ, НЕМИРНИ ПАТУВАЊА
„Скриени желби, немирни патувања“ е мозаичен роман во кој приказните на педесетина луѓе од различни меридијани се комбинираат со приказните на четири лика што живеат во Скопје. Ова е роман за пресекот меѓу личното и надворешното, роман за начинот на кој атмосферата и ситуациите ги обликуваат нашите внатрешни пејзажи, роман за потребата да се раскажуваат приказни и да се наоѓа блесокот и лагата во нив.
Тематски, книгата се занимава со некои од доминантните теми на сегашниот миг: односот меѓу реалното и виртуелното, прашањето на професионалниот успех и успехот во уметничкиот свет, потрагата по себеси која има една надворешна, а можеби сосем поинаква внатрешна форма.
- Награда „Роман на годината“ на Фондацијата „Славко Јаневски“ за 2020 година
- Македонски кандидат за наградата „Балканика“ за 2020 година
- Македонски кандидат за Наградата за литература на Европската Унија (EUPL) за 2022 година
- Признание Автор на годината на Македонската асоцијација на издавачи за 2022 година